Venu-Mareedu

ఆలస్యంగా రచనా వ్యాసంగం ప్రారంభించిన ఈ రచయిత ఇప్పటికి 19 కథలు రాశారు. వాటిల్లో నమస్తే తెలంగాణ – ముల్కనూరు సాహితీ పీఠం వారి 2021 కథల పోటీల్లో తృతీయ బహుమతి పొందిన’ కాటుక కన్నుల సాక్షిగా…’, ముళ్ళ చినుకులు సంకలనంలోని ‘ది టాయిలెట్ గర్ల్’, వెలుగు పత్రికలో వచ్చిన ‘నాక్కొంచెం ఇంగ్లీషు కావాలి!’, వార్త పత్రికలో వచ్చిన ‘అచ్చమ్మవ్వ ఆరో నాణెం’, సాహితీ ప్రస్థానంలో వచ్చిన ‘ప్రెజెంటెడ్ బై వసుధ’, జాగృతిలో అచ్చయిన ‘అవ్వా బువ్వ పెట్టవే!’, సాహితీ ప్రస్థానంలో వచ్చిన ‘ఆ నలుగురు లేని నాడు’ కథలు మంచిపేరు తెచ్చి పెట్టాయి.

ఖమ్మం జిల్లా నుండి వచ్చిన రచయితలు చాలా తక్కువగానే తెలంగాణ మాండలికంలో రాస్తున్నారని, తాను “అతని నుండి ఆమె దాకా….” కథను తెలంగాణ మాండలికంలో రాయటానికి ఎంతో శ్రమించాల్సి వచ్చిందని చెప్తున్నారు.

తెలుగులో కథలు రాయటంతో పాటు ఆల్ పోయెట్రీ డాట్ కామ్ వంటి వెబ్ సైట్లలో ఆంగ్ల కవిత్వాన్ని రాస్తున్నారు వేణు మరీదు.

రెండు తెలుగు రాష్ట్రాల స్థాయిలో నిర్వహించిన కథల పోటీలలో ఈ రచయిత ఎన్నో బహుమతులు పొందారు. నమస్తే తెలంగాణ – ముల్కనూరు సాహితీ పీఠం వారు నిర్వహిస్తున్న కథల పోటీల వల్ల తెలుగు సాహిత్యంలో విభిన్న ఇతివృత్తాలు కలిగిన కథలు పాఠక లోకానికి పరిచయం అవ్వటం చాలా సంతోషం అని వీరు అభిప్రాయ పడ్డారు. 1996 నుండి బోధనా రంగంలో ఉన్న వీరు ప్రస్తుతం ఖమ్మంలోని బాలికల కళాశాలలో ఆంగ్ల అధ్యాపకునిగా పనిచేస్తున్నారు.